అమెరికా అధ్యక్షుడు డొనాల్డ్ ట్రంప్‌‌పై మాజీ మిత్రుడు, ప్రపంచ కుబేరుడు మరోసారి సంచలన ఆరోపణలు సంధించారు. తీవ్రమైన లైంగిక నేరాలకు పాల్పడిన జెఫ్రీ ఎపిస్టన్ కేసుకు సంబంధించి గవర్నమెంట్ సీల్ చేసిన ఫైళ్లలో ట్రంప్ పేరు ఉందని మస్క్ ఆరోపించారు. ఈ మేరకు ఎపిస్టన్ పేరుతో ‘పెడోఫైల్ అరెస్ట్ కౌంటర్: 0000’’ అనే మెమెను ఎక్స్ ( ట్విట్టర్) లో పోస్టు చేస్తూ విమర్శలు గుప్పించారు. ‘ఏం టైం అయ్యింది? చూడండి.. మళ్లీ ఎవ్వరూ అరెస్టు కాలేదనే సమయం వచ్చింది!’ అంటూ కామెంట్ చేశారు. గతంలోనూ ఇదే అంశంపై మస్క్ సోషల్ మీడియాలో పోస్ట్ చేయడం గమనార్హం. ‘‘ట్రంప్ పేరు ఎపిస్టన్ ఫైళ్లలో ఉంది. అందుకే వాటిని ఇంకా విడుదల చేయడం లేదు’’ అంటూ విమర్శించారు. అయితే, కొద్దిసేపటికే ఈ పోస్ట్‌ను మస్క్ తొలగిస్తూ.. అంతదూరం వెళ్లకూడదని అనిపించిందని వివరణ ఇచ్చారు. అమెరికా పార్టీ పేరుతో మస్క్ రాజకీయాల్లోకి వచ్చిన విషయం తెలిసిందే. ట్రంప్ తీసుకొచ్చిన బిల్లును వ్యతిరేకించిన మస్క్.. ఇది ఆమోదం పొందిన మరుక్షణమే పార్టీ పెడతానని ప్రకటించారు.

అత్యంత తీవ్రమైన లైంగిక నేరాలు, ముఖ్యంగా మైనర్ బాలికలతో శారీరక సంబంధాలు, లైంగిక దౌర్జన్యానికి బలవతం చేయడం, చిన్నారుల అక్రమ రవాణా వంటి నేరాలకు పాల్పడినట్టు జెఫ్రీ ఎపిస్టన్‌పై అనేక కేసులు నమోదయ్యాయి. అమెరికా కుదిపేసిన ఈ కేసులో బిల్ క్లింటన్, బిల్ గేట్స్, డొనాల్డ్ ట్రంప్, బ్రిటన్ యువరాజు సహా పలువురి పేర్లు వినిపించాయి. కాగా, 1990లలో ట్రంప్, ఎపిస్టిన్ మధ్య స్నేహం ఉండేదని పలు నివేదికలు పేర్కొంటున్నాయి. ఇద్దరూ ఫ్లోరిడాకు చెందివారే కాగా.. అనేక ప్రైవేట్ పార్టీల్లో కలిసి పాల్గొన్నారని తెలుస్తోంది. 2017లో ఓ ఇంటర్వ్యూలో ఎపిస్టన్ మాట్లాడుతూ.. ‘ట్రంప్ నా అత్యంత సన్నిహితుడు’ అని కూడా అన్నట్లు వార్తలొచ్చాయి. కానీ, 2019లో ట్రంప్ ఈ వ్యాఖ్యలను ఖండిస్తూ.. ‘ఎపిస్టన్‌ నాకు మిత్రుడు కాదు.. 15 ఏళ్లుగా అతడితో మాట్లాడలేదు. నా గోల్ఫ్ క్లబ్‌లకు నిషేధించాను’ అన్నారు.

లైంగిక నేరాల కేసులో అరెస్టైన ఎపిస్టన్.. అనూహ్యంగా 2019లో జైల్లో ఉండగానే చనిపోయారు. కాగా, ఎపిస్టన్ కేసులో ఎఫ్‌బీఐ నివేదిక వెలుగులోకి వచ్చిన తర్వాత మస్క్ పై వ్యాఖ్యలు చేశారు. ఈ నివేదిక ప్రకారం.. ఎపిస్టన్ మరణం ఆత్మహత్యే అని తేల్చారు. ‘‘మూడో పక్షం జోక్యంపై ఎటువంటి ఆధారాలు లేవు.. అలాగే, బ్లాక్‌మెయిల్‌ కోసం ఎపిస్టన్ వద్ద క్లయింట్ల జాబితా (client list) లేదు అని’ స్పష్టంగా చెప్పారు. ఈ నివేదిక ప్రకారం.. ఎపిస్టన్ కేసుకు సంబంధించి ఇకపై ఎటువంటి వ్యక్తిపై కూడా కేసులు నమోదు చేయబోరని స్పష్టం చేశారు. ఎపిస్టన్ సహచరురాలిగా గుర్తింపు పొందిన బ్రిటీష్ సామాజిక హక్కుల కార్యకర్త ఘిస్‌లేన్ మాక్స్‌వెల్ బాలల లైంగిక అక్రమాలకు సంబంధించి 20 ఏళ్ల శిక్ష అనుభవిస్తోంది.

ఫైనాన్షియర్, ఇన్వెస్ట్‌మెంట్ బ్యాంకర్, సామాజిక కార్యకలాపాల్లో ప్రముఖుడిగా గుర్తింపు పొందిన జెఫ్రీ ఎపిస్టన్‌.. అమెరికా ఉన్నత వర్గాల్లో మంచి పలుకుబడి కలిగిన వ్యక్తి. రాజకీయ నాయకులు, పారిశ్రామికవేత్తలు, వ్యాపారులు, సెలబ్రిటీలు, పలుదేశాల యువరాజులు తదితరులతో సన్నిహిత సంబంధాలు ఉండేవి. వీరికి వందలాది బాలికలను ఎర వేసి తన ప్రైవేట్ ద్వీపం ఫ్లోరిడా, న్యూయార్క్, విర్జిన్ ఐలాండ్‌ల్లోకి తీసుకెళ్లి, వారిపై లైంగిక దాడులు చేయించినట్టు ఆరోపణలు ఉన్నాయి.