విజయ్ దేవరకొండ కింగ్డమ్ మూవీ జూలై 31న రాబోతోన్న సంగతి తెలిసిందే. ఎట్టకేలకు ఈ చిత్రానికి సంబంధించిన రిలీజ్ డేట్ అయితే ప్రకటించారు. రిలీజ్ డేట్ కోసం స్పెషల్‌గా ఓ వీడియోని కూడా వదిలారు. రిలీజ్ డేట్ ప్రోమో అంటూ వచ్చిన ఈ వీడియో మరింత హింట్ ఇచ్చింది. ఈ చిత్రంలో విజయ్ దేవరకొండ కానిస్టేబుల్‌గా కనిపించబోతోన్నారని అర్థమైపోయింది. మరి ఖైదీగా ఎందుకు మారాడు? అది వేరే కథనా? ఇది వేరే టైం లైన్ అయి ఉంటుందా? అనే ఆసక్తికర అంశాలతో రిలీజ్ డేట్ ప్రోమో సాగింది.

కింగ్డమ్ రిలీజ్ డేట్ ప్రోమో మీద రష్మిక స్పందించారు. ఈ ప్రాజెక్ట్ కోసం ఎంతగానో ఎదురుచూస్తున్నాను.. ఇక జూలై 31న పండుగే.. టీంకు ఆల్ ది బెస్ట్ అన్నట్టుగా రష్మిక ట్వీట్ వేశారు. ఆ ట్వీట్‌కు విజయ్ స్పందించారు. రషీ.. నువ్వు అన్నట్టుగా జరగాలి అంటూ రిప్లై ఇచ్చారు. మరి ఈ ట్వీట్‌కు మళ్లీ రష్మిక స్పందిస్తారో లేదో చూడాలి.

కింగ్డమ్ సినిమా కోసం విజయ్ ఫ్యాన్స్ గత రెండేళ్లుగా ఎంతగానో ఎదురుచూస్తున్న సంగతి తెలిసిందే. మధ్యలో ఫ్యామిలీ స్టార్ వచ్చింది. కానీ అది అంతగా మెప్పించలేకపోయింది. అసలు ముందుగా రావాల్సిన ఈ కింగ్డమ్ మాత్రం పలు మార్లు వాయిదాలు పడుతూనే వచ్చింది. వీరమల్లు సినిమా వల్ల కూడా కింగ్డమ్ పలు మార్లు వెనక్కి వెళ్లాల్సి వచ్చింది. ఇక ఇప్పుడు నిర్మాత నాగవంశీ అయితే వారం గ్యాప్‌తో వీరమల్లుకి పోటీగా వస్తున్నారు.

ఒక వేళ వీరమల్లుకి విపరీతమైన పాజిటివ్ టాక్ వస్తే అప్పుడు కింగ్డమ్‌కి థియేటర్ల సమస్య ఏర్పడుతుంది. వీరమల్లుకి యావరేజ్ టాక్ వచ్చినా, డిజాస్టర్ టాక్ వచ్చినా కూడా ఇక రెండు వారాల వరకు కింగ్డమ్‌కి ఎలా ఢోకా ఉండదు. మరి వీరమల్లు ఫలితం ఎలా ఉంటుందో? దాన్ని పట్టి కింగ్డమ్‌కు ఎలాంటి రిజల్ట్ వస్తుందో చూడాలి. అసలే జూలై మొత్తం బాక్సాఫీస్ వెలవెలబోయేలా ఉంది. ఇక వీరమల్లుతో అంతో ఇంతో సందడి కనిపించేలా ఉంది. ఆగస్ట్ మాత్రం వార్ 2, కూలీ అంటూ బాక్సాఫీస్ షేక్ అయ్యేలానే ఉంది.