హృతిక్ రోషన్, ఎన్టీఆర్ కలిసి నటించిన మల్టీస్టారర్ మూవీ ‘వార్ 2’ ఆగస్టు 14న రిలీజై మొదటిరోజే మిక్స్‌డ్ టాక్ తెచ్చుకున్న సంగతి తెలిసిందే. వీకెండ్ ముగియడంతో ఈ మూవీ కలెక్షన్లు దారుణంగా పడిపోయాయి. సోమవారం ఇండియా మొత్తం మీద కేవలం రూ.6.5 కోట్లు మాత్రమే కలెక్ట్ చేసిందంటేనే పరిస్థితి అర్థం చేసుకోవచ్చు. ఎన్టీఆర్ నటించడంతో ఈ చిత్రంపై తెలుగులోనూ భారీ అంచనాలు నెలకొన్నాయి. అయితే రిలీజ్ తర్వాత అదంతా ఒక్కసారిగా మారిపోయింది. హృతిక్ రోషన్‌ని బాగా హైలెట్ చేసి ఎన్టీఆర్‌ని సైడ్ క్యారెక్టర్‌గా మార్చేశారని ప్రేక్షకులు పెదవి విరిచారు. ఆ ప్రభావం కలెక్షన్లపై భారీగానే పడుతోంది. ఎన్టీఆర్ బాలీవుడ్ మూవీలో నటించి తప్పు చేశాడని ఫ్యాన్స్ కూడా ఫీలవుతున్నారు. ఎన్టీఆర్‌కి దక్కిన చేదు ఫలితంతో ఇప్పట్లో మరో తెలుగు హీరో బాలీవుడ్‌కి వెళ్లాలంటే భయపడే పరిస్థితి తలెత్తింది. అయితే తాజాగా వినిపిస్తోన్న టాక్ ప్రకారం ఎన్టీఆర్ మరో హిందీ మూవీలో నటించనున్నారని తెలుస్తోంది.

బాలీవుడ్‌లో ‘ధూమ్’ ప్రాంఛైజీకి సెపరేట్ ఫ్యాన్ బేస్ ఉన్న సంగతి తెలిసిందే. దొంగతనాల మీద గతంలో వచ్చిన ‘ధూమ్’ మూవీలో జాన్ అబ్రహం దొంగగా, అభిషేక్ బచ్చన్ పోలీస్ ఆఫీసర్‌గా నటించారు. ఇందులో హాలీవుడ్ మూవీ రేంజులో ట్విస్టులు అదిరిపోవడంతో ప్రేక్షకులు బ్రహ్మరథం పట్టారు. ఇక ‘ధూమ్ 2’లో హృతిక్ రోషన్, ఐశ్వర్యరాయ్ నటించడంతో క్రేజ్ మరింత పెరిగింది. అన్ని కమర్షియల్ హంగులతో తెరకెక్కిన ఈ చిత్రం బ్లాక్‌బస్టర్‌గా నిలిచింది. ఇక అమీర్‌ఖాన్ ప్రధాన పాత్రలో నటించిన ‘ధూమ్ 3’ ఆశించిన రీతిలో సక్సెస్ కాలేకపోయింది. తాజాగా ‘ ధూమ్ 4 ’ చిత్రం పట్టాలెకక్కనుండటంతో ఇందులో ఓ తెలుగు హీరో నటించనున్నట్లు వార్తలొస్తున్నాయి. ఈ మూవీలో రణ్‌బీర్ కపూర్ దొంగగా నటించేందుకు ఎప్పుడో గ్రీన్‌సిగ్నల్ ఇచ్చాడు. దీనికి ‘వార్ 2’ డైరెక్టర్ అయాన్ ముఖర్జీకే దర్శకత్వ బాధ్యతలు ఇవ్వాలని నిర్మాత ఆదిత్య చోప్రా నిర్ణయించుకున్నారట.

అయితే ఇందులో పవర్‌ఫుల్ పోలీస్‌ ఆఫీసర్ పాత్రకి జూనియర్ ఎన్టీఆర్ ‌ని తీసుకోవాలని మేకర్స్ అనుకుంటున్నారట. జూనియర్ ఎన్టీఆర్ ‘వార్ 2’తో బాలీవుడ్ అరంగ్రేటం చేసిన సంగతి తెలిసిందే కదా. అయితే ఇందులో నిజమెంత ఉందన్నది తెలియాల్సి ఉంది. ఎన్నో అంచనాలతో వచ్చిన ‘వార్ 2’ ఫ్లాప్ కావడంతో ఎన్టీఆర్‌తో పాటు ఆయన ఫ్యాన్స్ కూడా ఫీలవుతున్నారు. ఈ నేపథ్యంలో ఎన్టీఆర్ మరోసారి బాలీవుడ్ ప్రాజెక్ట్ ఓకే చేసే సాహసం చేస్తాడా? అన్నది చర్చనీయాంశంగా మారింది. ఎన్టీఆర్ ప్రస్తుతం ప్రశాంత్ నీల్ డైరెక్షన్లో నటిస్తున్న సంగతి తెలిసిందే. దాని తర్వాత త్రివిక్రమ్ శ్రీనివాస్‌తో ఓ ప్రాజెక్ట్ చేయనున్నారు.
వీరేష్ బిళ్ళ