మెగా పవర్ స్టార్ రామ్‌ చరణ్‌ హీరోగా బుచ్చిబాబు సానా దర్శకత్వంలో తెరకెక్కుతున్న చిత్రం ‘పెద్ది’. ఇందులో బాలీవుడ్ బ్యూటీ జాన్వీ కపూర్‌ హీరోయిన్‌గా నటిస్తున్న సంగతి తెలిసిందే. ఆమె పుట్టినరోజు సందర్భంగా మేకర్స్ ఈ విషయాన్ని ప్రకటించారు కానీ.. ఫస్ట్ లుక్ రిలీజ్ చెయ్యలేదు. తాజాగా జాన్వీ పాత్రకు సంబంధించిన వివరాలను అధికారికంగా వెల్లడించారు. ఆమె లుక్ ని రివీల్ చేశారు.

‘పెద్ది’ సినిమాలో అచ్చియ్యమ్మ అనే పాత్రలో జాన్వీ కపూర్ కనిపించనున్నట్లు చిత్ర బృందం తెలిపింది. ఈ సందర్భంగా రెండు వేర్వేరు స్టిల్స్ సోషల్ మీడియాలో షేర్ చేశారు. ఆమె ఒక ఫైర్‌బ్రాండ్‌ అని పేర్కొన్నారు. పెద్ది ప్రేయసిగా, ఎవరికీ భయపడని డేరింగ్ విలేజ్ గర్ల్ గా ఆమె నటిస్తున్నట్లు తెలుస్తోంది. ఓ పోస్టర్ లో జీపు మీదెక్కి రెండు చేతులెత్తి కాన్వాస్ చేస్తున్న జాన్వీ.. మరో పోస్టర్ లో మైక్ పట్టుకొని పాట పాడటానికి రెడీగా ఉన్న సింగర్ గా కనిపించింది. సెకండ్ పోస్టర్ లోని జాన్వీ లుక్ 'రంగస్థలం'లోని జిగేల్ రాణిని గుర్తు చేస్తోంది.
ఉత్తరాంధ్ర బ్యాక్‌డ్రాప్‌లో స్పోర్ట్స్ కథాంశంతో 'పెద్ది' చిత్రాన్ని రూపొందిస్తున్నారు. కన్నడ నటుడు శివరాజ్‌ కుమార్‌ కీలక పాత్ర పోషిస్తున్నారు. మీర్జాపూర్ మున్నా భయ్యా, జగపతి బాబు ఇతర ప్రధాన పాత్రలు పోషిస్తున్నారు. వచ్చే ఏడాది మార్చి 27న ఈ పాన్ ఇండియా సినిమా భారీ ఎత్తున విడుదల కానుంది.