సంధ్య థియేటర్ ఘటనలో పోలీసులు అల్లు అర్జున్‌ను అరెస్ట్ చేశారు. కానీ శుక్రవారం సాయంత్రం హైకోర్టు బన్నీకి మధ్యంతర బెయిల్ మంజూరు చేసింది. కానీ బెయిల్ కాపీ సరిగ్గా లేదని, టైంకి అందలేదని చంచల్ గూడ జైలు అధికారులు శనివారం ఉదయం విడుదల చేశారు. జైలు నుంచి నేరుగా బన్నీ తన గీతా ఆర్ట్స్ కార్యాలయానికి వెళ్లాడు. అక్కడి నుంచి ఇంటికి వెళ్లాడు. అక్కడ మీడియతో మాట్లాడాడు.

నాకేం కాలేదు..క్షేమంగానే ఉన్నా.. చట్టాన్ని, న్యాయాన్ని గౌరవిస్తాను.. వారికి సహకరిస్తా.. బాధిత కుటుంబానికి ప్రగాఢ సానుభూతి.. ఆ ఘటన మాకు తెలియకుండా జరిగింది.. అయినా అది దురదృష్టకరం.. గత 20 ఏళ్లుగా సంధ్య థియేట‌ర్‌కు వెళ్తున్నా.. కానీ ఈ సారి ఇలా జరగడం దురదృష్టకరం.. ఏం చేసినా కూడా వారికి జరిగిన నష్టాన్ని పూడ్చలేం.. కానీ ఏ సాయం కావాలన్నా తోడుగా ఉంటా.. నాకు అండగా నిలిచిన, సపోర్ట్ ఇచ్చిన ప్రతీ ఒక్కరికీ థాంక్స్.. కేసు గురించి నేనేమీ మాట్లాడలేను.. అది చట్టం చూసుకుంటోంది.. చట్టం తన పని తాను చేసుకుంటూ పోతుంది.. నాకు న్యాయ వ్యవస్థ మీద నమ్మకం ఉంది.. ఈ కేసు గురించి నేను ఏమీ మాట్లాడను అని అల్లు అర్జున్ అన్నాడు.

అల్లు అర్జున్ కోసం ఫ్యామిలీ అంతా గుమ్మం వద్దే ఎదురుచూస్తూ ఉన్నారు. ఇక బన్నీ రాకతో అర్హ, అయాన్‌లు పరిగెత్తుకుంటూ వచ్చారు. తండ్రిని చూడటంతో పిల్లలు తెగ సంతోషపడ్డారు. పిల్లల్ని చూసి బన్నీ భావోద్వేగానికి గురయ్యాడు. తన పాపను ఎత్తుకుని బన్నీ ముద్దాడాడు. అయాన్‌ను దగ్గరకు తీసుకున్నాడు. ఇక భార్య స్నేహారెడ్డిని హత్తుకుని ఎమోషనల్ అయ్యాడు.

ఇక బన్నీని కుటుంబ సభ్యులు పరామర్శించారు. ఇంటి గుమ్మం వద్దే ఇలా గుమ్మడి కాయతో దిష్టి కూడా తీయించారు. మొత్తానికి బన్నీ మాత్రం చాలా తెలివిగా మీడియా ముందు మాట్లాడాడు. కేసు గురించి ఎక్కడా మాట్లాడకుండా.. చట్ట, న్యాయ వ్యవస్థల మీద నమ్మకం ఉంది.. కేసు గురించి ఏమీ మాట్లాడను.. మాట్లాడకూడదు అంటూ చెప్పేసి వెళ్లిపోయాడు