సంధ్య థియేటర్ ఘటనలో అల్లు అర్జున్‌ అరెస్ట్ అయిన సంగతి తెలిసిందే. చిక్కడ పల్లి పోలీసులు శుక్రవారం మధ్యాహ్నం బన్నీని అరెస్ట్ చేసి వైద్య పరీక్షల నిమిత్తం గాంధీ హాస్పిటల్‌కు తరలించారు. అనంతరం నాంపల్లి కోర్టులో పొందు పర్చారు. అక్కడ బన్నీకి పద్నాలుగు రోజుల రిమాండ్ విధించారు. మరో వైపు బన్నీ వైపు తరుపున న్యాయవాదులు హైకోర్టులో క్వాష్ పిటీషన్ వేశారు. ఆ విచారణ సాయంత్రం ఆరు గంటల వరకు కొనసాగింది. సుదీర్ఘమైన వాదోపవాదనల తరువాత బన్నీకి మధ్యంతర బెయిల్‌ను హైకోర్టు ఇచ్చింది.

అయితే ఆ బెయిల్ కాపీ సరిగ్గా లేదంటూ జైలు అధికారులు తిప్పి కొట్టేశారు. ఆన్ లైన్‌లోనూ ఇంకా అప్లోడ్ కాలేదు అంటూ జైలు అధికారులు సాకులు చెప్పారు. రాత్రి వరకు జైలు వద్దు అల్లు అరవింద్ ఎదురుచూసి విసుగు చెందాడు. ఇప్పుడు విడుదల చేయడం కుదరదు అని విషయం తెలుసుకోవడంతో అరవింద్ అక్కడి నుంచి వెళ్లిపోయాడు. ఉదయం పూట రిలీజ్ చేస్తామని మీడియాతో జైలు అధికారులు కూడా తెలిపారు.

అయితే రాత్రంతా కూడా బన్నీ అక్కడే ఉండిపోవాల్సి వచ్చింది. ఒక రాత్రి జైలు జీవితం గడిపినట్టు అయింది. బన్నీకి ఫుడ్ ఇచ్చినా కూడా తినేందుకు నిరాకరించాడట. నేలపైనే అలా పడుకుని ఉన్నాడు. రగ్గు, దుప్పట్లు కూడా ఇచ్చారట. కానీ బన్నీ మాత్రం రాత్రంతా నిద్ర పోకుండా అలానే ఉన్నాడట. ఎప్పుడు విడుదల చేస్తారు అని జైలు అధికారులతో మాత్రమే మాట్లాడట. మిగతా ఎవ్వరితోనూ అక్కడ మాట్లాడకుండా సైలెంట్‌గా ఉన్నాడట.

చివరకు బన్నీని శనివారం ఉదయం ఆరు గంటల 45 నిమిషాలకు జైలు నుంచి విడుదల చేశారు. జైలు నుంచి నేరుగా గీతా ఆర్ట్స్ ఆఫీస్‌కు వెళ్లాడు. అక్కడే సుదీర్ఘ చర్చలు పెట్టుకున్నారు. తండ్రి, మామతో కలిసి బన్నీ సమాలోచనలు చేశాడు. భవిష్యత్ కార్యాచరణపై మాట్లాడినట్టుగా తెలుస్తోంది. గీతా ఆర్ట్స్ నుంచి ఇంటికి వెళ్లిన బన్నీ.. అక్కడ ఫ్యామిలీని చూసి ఎమోషనల్ అయ్యాడు. అనంతరం మీడియాతో మాట్లాడాడు. కోర్టులో కేసు నడుస్తోంది.. కాబట్టి నేను ఆ కేసు గురించి మాట్లాడను.. నేను క్షేమంగానే ఉన్నాను.. ఆందోళన చెందొద్దు.. బాధిత కుటుంబానికి ఎల్లప్పుడూ అండగానే ఉంటాను అని బన్నీ తెలిపాడు.