మనిషి జీవితం గాలి బుడగ లాంటిదని పెద్దలు అంటూ ఉంటారు. మృత్యువు ఎప్పుడు.. ఏ రూపంలో వస్తుందో ఎవరూ ఊహించలేరు. చావు ఎటువైపు నుంచైనా దూసుకు రావచ్చు. వేటాడే మృత్యువు నుంచి తప్పించుకోవడం ఎవరి తరం కాదు. అప్పటి వరకు సరదాగా గడిపిన వారు చూస్తుండగానే ప్రాణాలు కోల్పోతుంచారు. ఇంకొందరి మరణాలు ట్రాజెడీగా ఉంటాయి. గొంతులో ఆమ్లెట్‌, మాంసం ముక్క, కొబ్బరి ముక్క ఇరుక్కొని ప్రాణాలు కోల్పోయిన ఘటనలు ఇటీవల కాలంలో చాలానే చూశాం. తాజగా ఓ వ్యక్తి కోడి గుడ్డు గొంతులో ఇరుక్కొని ప్రాణాలు విడిచాడు.

నాగర్ కర్నూల్ జిల్లాలో ఈ విషాదకర ఘటన చోటు చేసుకుంది. బిజినేపల్లి మండలం నందివడ్డేమాన్‌‌ గ్రామానికి చెందిన తిరుపతయ్య(60) అనే వ్యక్తి ఆదివారం (నంబర్ 3) లింగాలలో ఉన్న ఓ బంధువు ఇంటికి వెళ్లాడు. అక్కడి నుంచి అప్పాయిపల్లిలో ఉన్న మరో బంధువు ఇంటికి వెళ్లేందుకు లింగాల బస్టాండ్‌కు చేరుకున్నాడు. ఆకలిగా అనిపించటంతో అక్కడి బజ్జీల బండి వద్ద కోడిగుడ్డు కొనుకున్నాడు. గుడ్డు తింటుండగా.. అనుకోకుండా అది గొంతులో ఇరుక్కుంది. దీంతో తిరుపతయ్య ఊపిరాడక అక్కడిక్కడే కుప్పకూలిపోయాడు. ఏం జరిగిందో అర్థంకాని స్థానికులు అతడికి నీరు తాగించి సపర్యలు చేసినా ఫలితం లేకుండా పోయింది. అప్పటికే తిరుపతయ్య ప్రాణాలు కోల్పోయాడు.

కాగా, గతంలోనూ ఇటువంటి ఘటను చోటు చేసుకున్నాయి. హైదరాబాద్ ఎర్రగడ్డ మానసిక రోగుల ఆసుపత్రిలో ఓ రోగి కోడిగుడ్డు నోట్లో ఇరుక్కొని ప్రాణాలు కోల్పోయాడు. మరో ఘటనలో ఓ వ్యక్తి మద్యం దుకాణానికి వెళ్లి మందు తాగుతూ ఆమ్లేట్ తిన్నాడు. అయితే ఆమ్లేట్ గొంతుకు అడ్డంగా ఇరుక్కోవటంతో అతడు స్పాట్‌లోనే ప్రాణాలు కోల్పోయాడు. చికెన్ ముక్క, మటన్ ముక్కలు గొంతులో ఇరుక్కొని కూడా చాలా మంది ప్రాణాలు కోల్పోయారు.

తినే సమయంలో జాగ్రత్తగా ఉండాలని డాక్టర్లు చెబుతున్నారు. టీవీ, సెల్‌ఫోన్ మాట్లాడుతూ తినకూడదని.. కేవలం తిండి మీదే ధ్యాస ఉండేలా చూసుకోవాలని చెబుతున్నారు. కోడిగుడ్డు వంటివి తినే సమయంలో మరింత జాగ్రత్త అవసరం అని అంటున్నారు. గుట్టు పూర్తిగా నోట్లో పెట్టుకుంటే ఒక్కోసారి అది గొంతులో ఇరుక్కుంటుందని... ఆ తర్వాత శ్వాస నాళం బ్లాక్ అయిపోయి ఊపిరి ఆడక చనిపోయే ప్రమాదం ఉందని హెచ్చరిస్తున్నారు. చిన్న పిల్లలకు సైతం కోడి గుడ్డు వంటివి చిన్న చిన్న ముక్కలుగా చేసి ఇవ్వాలని సూచిస్తున్నారు.